Volta inclusiva ás clases da man do curso de informática da ASCM

• Hoxe a ASCM deu comezo ao seu curso de informática e novas tecnoloxías, na sede de Ferrol, grazas á financiación da Consellería de Política Social e Benestar da Xunta de Galicia.

  

                      Alumnas e alumnos na presentación do curso.

A ASCM inaugurou hoxe o curso de informática e novas tecnoloxías "Conéctate ASCM" que, se prolongará até o vindeiro 8 de abril, e conta coa financiación da Consellería de Política Social e Benestar da Xunta de Galicia. As clases son de carácter gratuíto e se impartirán en horario de mañá (9.30 h.-13-30 h.) e de tarde (16.00- 20.00 h.), de luns a venres, para adaptarse ás necesidades e dispoñibilidade das persoas usuarias.

                 Alumnas e alumnos na presentación do curso.

O obradoiro será impartido na Sede da ASCM na cidade de Ferrol (Rúa San Roque e Ánimas 18-19, bloque 2) e a principal finalidade do mesmo é rachar coa fenda dixital existente entre o colectivo de persoas con discapacidade. Estamos inmersos na era da información e da comunicación, nunha sociedade en rede onde o manexo das novas ferramentas resulta fundamental para comunicarse, realizar trámites administrativos da vida cotiá, etc.

Desde a ASCM realizamos unha forte aposta pola innovación para tratar de acadar un maior grao de empregabilidade e inclusión do colectivo na sociedade. O temario incluirá unha importante presencia do correcto emprego dos teléfonos móbiles intelixentes (smartphones) que facilitan a vida de moitas persoas con apps de lingua accesible, especializadas en accesibilidade nas cidades, etc,; alertando, a un tempo, dos riscos existentes na rede, en materia de estafas, sobreexposición, dereito a imaxe. 

Esta iniciativa forma parte da área da entidade de emprego e formación na que, cada ano,  ASCM oferta de diferentes obradoiros e cursos que posibiliten ás persoas usuarias mellorar competencias tranversais que lles permitan un maior grao de autorrealización e inclusión na sociedade na que desenvolven o seu día a día. Aquelas persoas interesadas en recibir máis información, poden facelo no 981 35 14 30 ou no mail ascm.ferrol@ascmferrol.com. 

ASCM inicia o ano apostando polas novas teconoloxías

• O vindeiro 7 de xaneiro, a Sede da Asociación Sociocultural ASCM, acollerá o inicio dun novo curso de informática e novas tecnoloxías.

Cartaz obradoiro Novas Tecnoloxías ASCM.

A Asociación Sociocultural ASCM, grazas á financiación da Xunta de Galicia, a través da Consellería de Política Social e Benestar, e a Unión Europea, mediante o FSE, porá en marcha este proxecto, que ten por obxecto o fomento da autonomía dixital das persoas con discapacidade ao mercado laboral. A partir do 7 de xaneiro, a entidade, dentro da súa vocación de promoción da inclusión social, comezará a impartir o obradoiro de Informática e Novas Tecnoloxías: “Conéctate ASCM”, que persigue mellorar competencias fundamentais como son o manexo básico de equipos informáticos (paquete Office, etc) así coma o coñecemento de trámites, apps, etc. que poidan ser de utilidade para as persoas participantes.

ASCM leva anos apostando pola plena inclusión das persoas con discapacidade no mercado laboral, a través da súa área de Emprego e Formación. Neste caso, o equipo docente procurará, con este obradoiro, revertir a fenda dixital existente dentro do colectivo; estando este centrado nun aspecto de vital importancia dentro da sociedade actual como son as TIC (Tecnoloxías da Información e a Comunicación), xa que constitúen un enorme activo como ferramienta e motor de busca de emprego.



Traballando na liña estratéxica de ser referentes como axente innovador e de cambio, a entidade, porá en marcha unha orientación dinámica, centrada nas aspiracións, fortalezas e novos retos dixitais das participantes. En caso de interese en participar e coa finalidade de ampliar a información relativa ao proxecto, pode contactar coa entidade mediante o teléfono 981 35 14 30 ou contactando a través do mail: ascm.ferrol@ascmferrol.com.

Repercusión en medios:

• Diario de Ferrol, 2019-12-16 "La Asociación ASCM inica 2020 con un taller de nuevas tecnologías".