A ASCM achega as distintas capacidades á muller do rural cunha xornada na A.A.V.V de Covas

• A "Xornada do Noso" achegará a realidade do colectivo, da muller con discapacidade, ás/ós veciños de Covas.

Cartaz da "Xornada do Noso" que organiza a ASCM.

A Asociación Sociocultural ASCM, dentro do programa "Iniciativa Xove" financiado pola Consellería de Política Social e Benestar da Xunta de Galicia, celebrará o sábado ás 18.00 h., na A.A.V.V de Santa Comba (Covas, Ferrol), a "Xornada do Noso". Esta iniciativa, que pretende achegar á realidade da muller con discapacidade ás/os veciñas/os, contará con diversas actividades; convidando á participación e implicación das persoas asistentes.

                                        Desfile de moda tradicional inclusivo.

A xornada comezará cun desfile inclusivo no que as socias e voluntarias da entidade amosarán as diferentes capacidades, no eido da moda tradicional galega. Este desfile é posible grazas ao préstamo, das prendas de roupa, por parte do Padroado de Cultura do Concello de Narón. Serán, precisamente, algunhas/os das/os alumnas/os da Escola de Música do Padroado as/os que amenicen a xornada cos sons máis tradicionais da nosa cultura. O broche final do evento será o coloquio "Xanta e Fala" no que se servirán algúns postres tradicionais galegos para acompañar, aquilo que é máis noso, a afamada retranca galega.

O evento é de carácter libre e de balde, até completar o aforo, e está aberto a que as persoas asistentes leven os seus traxes tradicionais e instrumentos musicais para darlle a Covas o toque "máis noso", dun xeito colaborativo. É esta a primeira das tres xornadas temáticas que ASCM organiza, dentro do marco de "Iniciativa Xove". O sábado 21 será a quenda da "Xornada WorkIn", centrada no eido laboral, e pechará a "Xornada Geek", o sábado 28 de setembro, có mundo friki como epicentro do evento.

Para máis información sobre estas actividades, as persoas interesadas, poderán resolver as súas dúbidas no teléfono 981 35 14 30 ou no correo electrónico comunicacionascm@gmail.com. Se prefieren solicitar información de xeito presencial, poderán facelo nas oficinas de San Roque e Ánimas Bajos 18-19, Bloque  2, en horario de 9.30 a 13.30 e de 16.00 a 20.00 h.

Repercusión en medios:

• Galicia Diario, 2019-09-13 "A ASCM achega as distintas capacidades ao rural".
• Diario de Ferrol, 2019-09-15 "La cultura tradicional protagonizó una velada de música, baile y gastronomía en Santa Comba".

A ASCM levará, o xoves, as distintas capacidades ao Campus de Esteiro, durante a Xornada de Benvida da UDC

• A Asociación Sociocultural ASCM participará na Xornada de Benvida aos universitarios no Campus de Esteiro.

                                 Cartaz da participación da ASCM na Xornada da UDC.

A ASCM participará, durante a mañá do xoves, na Xornada de Benvida que a UDC organiza para as universitarias e universitarios que comezan o curso académico. A ASCM contará cun stand informativo para achegar información sobre as actividades que se desenvolven na entidade e as múltiples sinerxias que se poden establecer coa comunidade universitaria. Asimesmo, desde ASCM, propoñen unha iniciativa de carácter máis dinámico: "Xente!! Senta e Sente".

Esta proposta pretende que as/os alumnas/os participantes experimenten, en primeira persoa, o que é desprazarse en cadeira de rodas polo campus. Con axuda da equipa de Voluntariado Inclusivo da ASCM terán que acceder a espazos habituais da Universidade: servizos, cafetería, aulas, etc. É un xeito de concienciar e sensibilizar sobre as barreiras ás que o colectivo debe facer fronte no eido académico. Algo fundamental nun campus onde se formarán futuras/os deseñadoras/os industriais, entre outros gremios.

A UDC promove esta xornada de benvida con numerosos servizos e actividades deportivas, culturais e medioambientais. Contarán, ademais, con postos informativos dos diferentes Servizos e Unidades da UDC.   O alumnado poderá inscribirse até mañá na seguinte ligazón: Formulario Inscrición Xornada Benvida UDC.

A ASCM dará, con esta actividade, o pistoletazo de salida ás actividades conmemorativas da Semana da Mobilidade Europea que se celebra entre o 16 e 20 de setembro. Durante estes días, a entidade, colaborará con diferentes concellos da comarca para visibilizar a necesidade de crear espazos urbanos accesibles para todas e todos.

A ASCM prepara unha serie de sábados temáticos, dentro do programa Iniciativa Xove

• O programa XMULLER= procura un achegamento das persoas máis novas á actividade da ASCM, a través dunha serie de xornadas temáticas.

Cartaz do Programa de Iniciativa Xove.

A ASCM, dentro do programa de Iniciativa Xove promovido pola Xunta de Galicia, desenvolverá durante o mes de setembro unha serie de xornadas temáticas. O obxectivo pasa por tratar de achegar o labor desenvolvido pola entidade a un público novo. O programa XMuller= terá a perspectiva de xénero moi presente. O slogan da proposta "súmate e completa a ecuación" pretende motivar á participación do maior número de persoas posibles.

O programa está formado por 3 xornadas temáticas: A xornada do noso (14 de setembro), Xornada WorkIn (21 de setembro) e a Xornada Geek (28 de setembro). A continuación, detallamos o programa de cada unha das iniciativas que serán de carácter libre e gratuíto até completar aforo.

• A xornada do noso: terá lugar o sábado 14 de setembro no local da Asociación de Veciños de Santa Comba, en Covas, ás 18.00 h. O evento consistirá nun encontro interxeneracional que terá como eixo central a cultura tradicional galega. Haberá un desfile de roupa tradicional; amosando as diferentes capacidades existentes na sociedade galega. O encontro estará amenizado polo alumnado da Escola do Padroado de Cultura do Concello de Narón.  Despois do desfile haberá un intercambio de experiencias e degustación de postres tradicionais galegos. A actividade é de carácter libre e gratuíto até completar aforo.

• A Xornada WorkIn: terá lugar o sábado 21 de setembro no paseo de San Valentín (Fene). Esta xornada estará centrada no mercado laboral e a importancia de reivindicar unha maior presenza da muller con discapacidade neste eido. A xornada dará comezo cun desfile de uniformes profesionais polo Paseo de San Valentín. Despois desta actividade, a xornada terá lugar no CPS San Valentín cun coloquio de experiencias e prevención de riscos e unha degustación de comida de tupper saudable para levar ao traballo. A participación neste evento é de carácter libre e de balde até completar aforo.

• A xornada Geek: terá lugar o sábado 28 de setembro no Paseo de Xubia (Narón). O epicentro desta actividade será a temática friki. A xornada inclúe unha andaina friki polo paseo, que será mediante inscrición previa e con disfraces de diferentes series e películas. Antes da citada andaina, a Asociación de Veciños Altea de Xubia, acollerá unha charla coloquio sobre a historia do videoxogo e o papel da muller, coa colaboración da Universidade da Coruña. Pechará a xornada unha degustación de comida friki "food freak" , no citado local, para recuperar forzas despois da andaina.

Desde ASCM iremos concretando información de cada unha das xornadas, nas que pretendemos participe o maior número de persoas posibles.  A idsea é trasladar a idea da inclusión, de xeito transversal, a tódalas esferas da vida. Para máis información relativa á iniciativa de XMULLER= está dispoñible o mail comunicacionascm@gmail.com ou o teléfono 981 35 14 30.