O Concello promove esta fin de semana en Caranza unha andaina inclusiva polo paseo marítimo

Dará comezo ás 12 horas e desenvolverase en colaboración coa asociación de veciños e a entidade sociocultural ASCM no marco dos actos conmemorativos do 50 aniversario do barrio

FERROL, 28 DE SETEMBRO. O Concello de Ferrol promove para esta fin de semana, o domingo 2 de outubro, ás 12 horas, unha nova andaina, neste caso no barrio de Caranza, aberta a toda a poboación. A concelleira de Benestar Social, Eva Martínez Montero, indicou que será a terceira edición da ‘Andaina Inclusiva de Cor-Sportod@s’ e desenvolverase no paseo marítimo do barrio coa colaboración da asociación veciñal de Caranza e a entidade sociocultural ASCM no marco dos actos conmemorativos polo 50 aniversario do barrio. 

 A edil lembrou que a inscrición é de balde e xa está aberto o prazo para que as persoas interesadas se anoten. Poden facelo na asociación de ASCM (rúa San Roque e Ánimas, Bloque 2, Baixo 18-19. Tlfo: 981351430/comunicacionascm@gmail.com) ou a través do formulario que se atopa no enlace https://bit.ly/AndainaCoresCaranza. Tamén a través da asociación de veciños de Caranza (tlfo: 981 32 58 52 ou no correo electrónico: avvcaranza@mundo-r.com). 

 A iniciativa busca “visibilizar a situación das persoas con diversidade funcional desde un entorno positivo e inclusivo”, indicou a edil. Será un evento “festivo no que todos os participantes poderán facer un percorrido de preto de dous quilómetros nos que serán espolvoreados con pos de cores”. O lema ‘Príngate de Cor’ invita a toda poboación a participar e deixar pegada no camiño “para alcanzar unha sociedade sen barreiras”, apuntou a edil. 

 A recepción e entrega de dorsais se realizará unha hora antes do inicio da andaina, ás 11.00 horas, cando remate o prazo de inscrición. Os participantes inscritos recibirán un paquete de benvida e durante o percorrido atoparán música, agasallos e premios, entre outros. A entidade veciñal aportará placas conmemorativas para as categorías participantes: á entidade social con máis participación, o centro escolar con máis participación, para o participante de maior idade e para o de menor idade.