O Concello anuncia ás asociacións e clubes baixas do 50% nas axudas se continúan os recortes do Goberno

O concelleiro de Cultura e Facenda, Guillermo Sánchez Fojo, e a edila de Deportes, Natalia Hermida, participaron onte nunha reunión á que se convocou ás distintas asociacións e clubes do municipio. A convocatoria tivo lugar na biblioteca municipal, a partir das 20.30 horas. No transcurso da mesma, os políticos locais recordaron aos presentes que este ano o Concello destina 1,5 millóns de euros a convenios con unhas setenta entidades para colaborar en diferentes apartados. Sánchez Fojo advertiu que, de cara ao vindeiro ano, se continúan as medidas do goberno de recorte presupostario, “vámolo pagar todos, pero en especial as administracións”. O concelleiro anunciou ao colectivo que, de manterse –ou incluso complicarse– a situación actual, as entidades terán que realizar recortes presupostarios e adaptar as súas contas porque o consistorio podería recortar as axudas un 50% con respecto a este ano. A reunión concertouse a modo de “prevención”, e tendo en conta que as diferentes entidades comezarán a planificar en breve as actividades para a vindeira tempada.

Os convenios, segundo Sánchez Fojo, remodelaríanse en función da programación. O edil subliñou que “ás entidades que reciban 300 euros, evidentemente, non lles imos tocar” e incidiu na importancia de que os clubes deportivos tomen nota da situación. “Pedimos ás entidades deportivas, que son as que máis gasto teñen, que sexan previsoras para que non acaben o ano con déficit”, apuntou o edil de Facenda. Este incidiu en que “non importa que 2011 sexa un ano electoral e dicimos isto agora para que non colla de sorpresa a ninguén, pero no Concello non podemos pedir un crédito para pagar subvencións ás asociacións e aos clubes”.
Nos convenios asinados este ano, as tarifas oscilan entre os 1.000 euros do Museo do Pobo Galego ou o Consorcio do Camiño Inglés e os 140.000 do Clube Narón Balompé.

Críticas do PP > O edil de Servizos Sociais, Miguel Hermida, asegurou onte descoñecer a reunión convocada polos seus socios de goberno na que se anunciou ás entidades –entre elas varias que dependen do departamento do concelleiro– esa decisión do consistorio. “Non é lóxico que se recorten as axudas ás entidades sociais porque xa están moi axustadas”, asegurou Miguel Hermida, aludindo a convenios como o de AFAL, de 6.000 euros. O concelleiro manifestou onte a súa “oposición radical” a que se diminúan eses convenios.

DiariodeFerrol, 16-6-2010